Соғлиқни сақлаш вазири марафонда иштирок этди

Жаҳон соғлиқни сақлаш ташкилоти маълумотига кўра, инсон саломатлиги 55 фоиз ҳолатда соғлом турмуш тарзига, 20 фоизи экологик муҳитга, 15 фоизи ирсий омиллар ва бор-йўғи 10 фоизи тиббиётга боғлиқ экан. Демак, узоқ умр кўриш учун соғлом турмуш тарзига риоя этиш керак.

– Ҳозирги урбанизация даврида камҳаракатлилик бутун дунёнинг ўткир муаммосига айланмоқда. Ҳолсизлик, уйқунинг бузилиши, диққат-эътиборни жамлашнинг секинлашиши, хотиранинг пасайиши, сабабсиз чарчаш, семизлик – бу белгилар кўпчиликда учрайди. Лекин камдан-кам одам уни ўйлайди, – дейди Соғлиқни сақлаш вазирлиги ҳузуридаги Аҳолининг соғлом турмуш тарзини қўллаб-қувватлаш ва жисмоний фаоллигини ошириш маркази директори Барно Одилова. – Жаҳон соғлиқни сақлаш ташкилоти маълумотига кўра, чекишдан йилига 5 миллиондан зиёд, камҳаракатлиликдан эса қарийб 5,3 миллион одам ҳаётдан кўз юмади. Соғлиқни сақлаш вазирлиги фуқароларни фаол ҳаракатга чақириб, пиёда юриш марафонини ташкил қилди. Бундай тадбирлар бир марталик эмас, балки доимий ўтказилади.

Эътиборли жиҳати, пиёда юриш барча жисмоний машқ турлари орасида энг қулайидир. Бунинг учун жуда кўп энергия сарфлашнинг ҳожати йўқ, ижобий таъсири эса жуда юқори. Юриш организмнинг умумий ҳолатига таъсир кўрсатади, мушакларни бақувват қилади, суяк тўқимасини мустаҳкамлайди, ҳаракатларни мувофиқлаштиришни ривожлантиради. Жисмоний фаолиятнинг бундай тури энг хавфсиз бўлиб, уни ҳар бир киши – ўсмирдан кексагача бемалол бажаришга қодир.

Мутахассисларнинг маълум қилишича, ҳафтасига атиги 2,5 соатлик жисмоний фаоллик эрта ўлим ҳолатларини 28 фоиз, юрак касалликлари эҳтимолини эса 20 фоиз камайтирар экан. Жисмоний фаоллик организмда биосинтез жараёнини фаоллаштиради.