Свитолина она бўлганидан кейинги илк совринини Страсбургда қўлга киритди

Украиналик теннис маликаси она бўлганидан кейинги илк совринини айнан Франциядаги турнирда қўлга киритди. WTA рейтингида 508-поғонада бораётган Свитолина ҳал қилувчи финал учрашувида дунёнинг 66-ракеткаси, россиялик Анна Блинковани 6/2, 6/3 ҳисобида мағлубиятга учратди. 

Бу теннисчиларнинг ўзаро ўтказган илк учрашуви эди. Бир соату 33 дақиқа давом этган финал баҳсида Элина 3 та қўшхатога йўл қўйиб, 1 та эйс ва 7 та брейкка эришди. 

Бу Свитолина учун фаолиятидаги 17-соврин бўлди. Ўтган йили она бўлган Элина шу йил март ойида яна катта теннисга қайтган эди. Страсбургдаги муваффақиятли иштирок унга 280 рейтинг очко ва 29,760 евро мукофот пули келтирди. У янгиланган рейтингда Топ-200 таликда бўлади. Блинкова эса 180 очко ва 17,590 еврога эга бўлди.