Свёнтек Штутгартда чемпионлик унвонини ҳимоя қилди

Польшалик теннисчи 110 дақиқа давом этган финал учрашувида дунёнинг иккинчи ракеткаси, беларуслик Арина Соболенкони 6/3, 6/4 ҳисобида мағлубиятга учратди. Бу билан у ўтган йилги чемпионлик унвонини муносиб тарзда ҳимоя қилди. 

Теннисчиларнинг ўзаро учрашувларидаги ҳисоб Ига фойдасига йириклашди - 5:2. Свёнтек 1, Соболенко 5 та эйс зарбасини амалга оширган. Қўшхатолар ҳар икки теннисчида ҳам 2 тани ташкил қилди. 

Свёнтек мавсумдаги Штутгартда иккинчи, фаолиятидаги ўн учинчи совринига эга чиқди. Бир ҳафталик меҳнат Игага 104,478 евро мукофот пули ҳамда 470 рейтинг очкосини тақдим этган.