TePe Sigeman 2026. 14 ёшли қардош гроссмейстеримиз пешқадам, Магнус ютқазди, Нодирбек Аржун билан ўйнади

Мусобақада саккиз гроссмейстер бош соврин учун баҳс олиб бормоқда. Улар орасида Нодирбек Абдусатторов ҳамда жаҳон рейтинги етакчиси норвегиялик Магнус Карлсен ҳам бор. Мусобақанинг 4-турида Абдусатторов оқ доналарда ҳиндистонлик Аржун Эригаисига қарши баҳс олиб борди ва ғалабали позицияга чиқиб олган бўлса-да, якунда дуранг билан кифояланди. Мағлубиятсиз серия давом этмоқда.  

Лекин ушбу дурангдан кейин Нодирбек Абдусатторов 2,5 очко билан қўшимча кўрсаткичларга кўра иккинчи ўринга тушиб қолди. Бунга туркиялик 14 ёшли гроссмейстер Ягиз Каан Эрдоғмушнинг швециялик Нилс Гранделиус устидан қозонган ғалабаси сабаб бўлди. Ягиз Каан 3 очко билан якка карвонбошига айланиб олди. 

Жаҳон рейтинги етакчиси Магнус Карлсен бироз кутилмаганда бу турда мағлубият аламини тотиб кўрди. Норвегиялик шахматчи нидерландиялик Йорден ван Форестга ютқазиб қўйди. Мусобақадаги ягона аёл иштирокчи Чжу Цзинер ниҳоят илк ғалабасини қўлга киритди. Хитойлик шахматчи қиз америкалик Энди Вудвордни таслим этди. 

Тўртинчи турдан сўнг Нодирбек Абдусатторов, Аржун Эригаиси ва Йорден ван Форест ҳисобида 2,5 очкодан бор. Магнус Карлсен 2 очко билан 5-поғонани банд этган. Энди Вудворд ҳисобида ҳам 2 очко бор. Нодирбекнинг 5-турдаги рақиби швециялик Нилс Гранделиус барча учрашувларда мағлубиятга учраган.