TePe Sigeman 2026. Абдусатторов ғалаба билан бошлади. Магнус Карлсен очко йўқотди

Мусобақада саккиз гроссмейстер бош соврин учун баҳсга киришди. Улар орасида Нодирбек Абдусатторов ҳамда жаҳон рейтинги етакчиси норвегиялик Магнус Карлсен ҳам бор. Мусобақанинг биринчи турида Абдусатторов қора доналарда ўйнаганига қарамай, турнирнинг ягона аёл иштирокчиси, хитойлик гроссмейстер Чжу Цзинерни мағлубиятга учратди. 

Магнус Карлсен оқ доналарда ҳаракат қилди ва ҳиндистонлик Аржун Эргаиси билан дурангга рози бўлди. Нидерландиялик Йорден ван Форест ҳамда туркиялик иқтидор эгаси Ягиз Каан Эрдоғмуш партиясида ҳам дуранг қайд этилди. Америкалик Энди Вудвард эса мезбон шахматчи Нилс Гранделиусни таслим этди. 

Бугун 2-турда Нодирбек Абдусатторов оқ доналарда Энди Вудвардга қарши баҳс олиб боради. Магнус Карлсен эса қора доналарда швециялик Нилс Гранделиус билан ҳисоб-китоб қилади. 

TePe Sigeman 2026. 2-тур жуфтликлари: 

Ягиз Каан Эрдоғмуш (Туркия) — Аржун Эргаиси (Ҳиндистон)

Нилс Гранделиус (Швеция) — Магнус Карлсен (Норвегия) 

Нодирбек Абдусатторов (Ўзбекистон) — Энди Вудвард (АҚШ)

Йорден ван Форест (Нидерландия) — Чжу Цзинер (Хитой) 

Эътиборга молик жиҳати шундаки, TePe Sigeman турнирининг сўнгги икки ғолиби ўзбекистонлик шахматчилар ҳисобланади. 2024 йил Нодирбек Абдусатторов, ўтган йили эса Жавоҳир Синдаров чемпионлик шоҳсупасига кўтарилган эди.