Торонто. Янник Синнер илк бор "Мастерс" турнири ғолиби бўлди

Жаҳоннинг 8-ракеткаси италиялик Янник Синнер Торонтодаги турнир финалида АТР рейтингида 18-ўринни эгаллаб турган австралиялик Алекс Де Минаурни 6/4, 6/1 ҳисобида мағлуб этди.

Учрашув бир соату 29 дақиқа давом этди. Италиялик теннисчи ўзаро учрашувлардаги устунликни мустаҳкамлади - 5:0.

Синнер ўз фаолиятида биринчи марта "Мастерс" турнири ғолиби бўлди. У ушбу ғалаба учун 1000 рейтинг очкоси ва 1 019 035 доллар мукофот пулига эга бўлади, Де Минаур эса 600 очко ва 556 630 доллар олади.

Турнир натижаларига кўра, Янник Синнер АТР рейтингининг олтинчи поғонасига кўтарилади. Бу унинг фаолиятидаги энг юқори кўрсаткич бўлади.