Тошкентга яна катта теннис қайтди! Пойтахтимизда иккита "Фьючерс" турнири ўтказилмоқда

Бу сафар пойтахтимизда фарқли равишда "Дэвис кубоги" эмас, ITF туркумидаги "Фьючерс" мусобақаси ўтказилмоқда. "GRAND PALACE CUP M15" халқаро турнирига "Юнусобод" спорт мажмуаси кортлари мезбонлик қилмоқда.

Мукофот жамғармаси 15 000 АҚШ долларини ташкил этувчи турнирнинг биринчи рақамли теннисчиси сифатида россиялик Евгения Тюрнев таснифланган (ATP-387). Кеча турнирнинг саралаш беллашувлари ўз ниҳоясига етди. Бироз аввал эса асосий тўр баҳсларига старт берилди.

Мусобақада бир қатор ҳамюртларимиз ҳам иштирок этишмоқда. Жумлалан, терма жамоамизнинг ёш аъзолари Максим Шин ва Амир Милушев, шунингдек, Дамир Абдусамадов, Раҳимбек Иброҳимов, Файзулло Мирзағаниев.

Айни дамда асосий тўрнинг илк босқич беллашувлари давом этмоқда. Ўйинларни мазкур ҳавола орқали жонли эфирда томоша қилишингиз мумкин.

Аҳамиятлиси, мазкур турнир ўз якунига етганидан кейин, 2 сентябрь кунидан бошлаб навбатдаги "Фьючерс" турнири старт олади. 13-14 сентябрь кунлари эса Тошкент шаҳрида Ўзбекистон ва Эстония терма жамоалари ўртасидаги "Дэвис кубоги" баҳслари бўлиб ўтади.