UFC 290 турнирининг бонус соҳиблари маълум

Оқшомнинг марказий жангида ярименгил (65 кг.гача) вазн тоифаси чемпиони, pound-for-pound рейтинги пешқадам, австралиялик Алекс Волкановски мексикалик даъвогар Яир Родригесга қарши октагонга кўтарилди. Жангнинг учинчи раунди ўтиб бораётган бир паллада Волкановски рақибини техник нокаутга учратди. 

Бироз аввал турнир ташкилотчилари томонидан бонус соҳиблари эълон қилинди. Кафолатланган гонорардан ташқари қўшимча 50 000 долларлик мукофот пулларини тўрт нафар жангчи қўлга киритди. 

Бразилиялик Александр Пантожа ҳамда мексикалик Брэндон Морено ўртасидаги сo-main event жанги турнирнинг энг яхши жанги деб топилди. Энг енгил вазн тоифаси чемпионлик камари учун кечган беш раундлик жангда Пантожа очколар ҳисобига кўра ғалаба қозониб, дивизионнинг янги чемпионига айланди. 

Шунингдек, чиройли жанг учун бразилиялик аёл яккакураш устаси Денис Гомес ҳамда ғалабаси туфайли Адесаньянинг навбатдаги рақибига айланган Жанубий Африка Республикаси вакили Дрикус Дю Плесси ҳам бонусни қўлга киритишди.