UFC раҳбари Канело - Кроуфорд жанги промоутери бўлади

Кеча иккинчи ўрта вазн тоифасида мутлақ жаҳон чемпиони Сауль "Канело" Альварес ҳамда мағлубият ва муроса нималигини билмай келаётган Теренс Кроуфорд ўртасидаги жанг расман эълон қилинганди. Ушбу йил жанги 12 сентябрь куни АҚШнинг Невада штати Лас-Вегас шаҳрида бўлиб ўтади.

Саудия Арабистони кўнгилочар бош бошқармаси раҳбари, промоутер сифатида қисқа муддатда катта жангларни ташкил этишга улгурган Турки Ал аш-Шейх мексикалик афсона билан 4 та жанг учун шартнома имзолаган. Улардан дастлабкиси кеча Ар-Риёд шаҳрида кубалик Уильям Скуллга қарши бўлиб ўтди ва унда "Канело" очколар ҳисобида ғалаба қозонганди.  

"12 сентябрь куни биз Лас-Вегасдаги "Allegiant" стадионида каттта бокс турнири ўтказамиз. Афсонавий "Канело" The Ring камарини машҳур Кроуфорддан ҳимоя қилади. Менинг акам Дана Уайт ушбу жангнинг промоутери бўлади", – деди Турки.