Улар ЖЧга борадилар №1: Ҳасанбой Дўсматов

Бугундан бошлаб эътиборингизга Гамбургда бўлиб ўтадиган жаҳон чемпионатида иштирок этадиган боксчиларимиз ҳақида кичик мақолалар тақдим этамиз. Ушбу мақолалар орқали спортчиларимизнинг бўлажак дунё биринчилигидаги имкониятлари, жанг услуби ва бунгача қўлга киритган натижаларини таъкидлаб ўтишга ҳаракат қиламиз.

Демак, илк мақоламиз суперенгил вазн тоифали (-49кг) боксчимиз Ҳасанбой Дўсматов ҳақида бўлади.

Ҳасанбой Дўсматов. Бу номни бугунги кунда Ўзбекистонда жуда кўпчилик танийди. Катта ёшдаги бувижонларимиздан тортиб, кичик ёшдаги сингилларимизгача Рио Олимпиадаси юлдузини биладилар. 2016 йилда Бразилияда бўлиб ўтган Олимпиада Ҳасанбойга мисли кўрилмаган шуҳрат олиб келган. Айнан Дўсматов ўша Олимпиадада Ўзбекистон терма жамоаси ҳисобига илк олтин медални қўшиб қўйганди. Якунда боксчимиз Олимпиада якунларига кўра энг яхши боксчига бериладиган Вэл Баркер совринини ҳам ўзиники қилиб олган ҳали ёдингиздан чиқмаган бўлса керак?

Зиёвуддин Тайганбаевнинг шогирди ҳисобланадиган Ҳасанбой бугун ҳаваскор боксда дунё миқёсидаги юлдуз ҳисобланади. Ўзининг чаққон, тезкор ҳаракатлари ва самарадор зарбалари эвазига Дўсматов рақибларини ер тишлатиб келмоқда. Уни олтин медаль қўлга киритиши мумкин бўлган боксчиларимиз қаторига киритишимиз мумкин.



Дўсматов Гамбургдаги жаҳон чемпионатига йўлланмани Тошкентда бўлиб ўтган Осиё чемпионатида қўлга киритган. Вакилимиз ўшанда мусобақа олтин медалини қўлга киритиш билан биргаликда турнирнинг энг яхши боксчиси учун аталган совринга ҳам лойиқ топилганди.



Мазкур жаҳон чемпионати боксчи учун биринчиси эмас. Ҳасанбой 2013 йилда Алматадаги ҳамда 2015 йилда Дохада бўлиб ўтган дунё биринчилигида ҳам иштирок этганди. Қозоғистондаги турнирда у бўлажак жаҳон чемпиони, мезбон боксчи Биржан Жакиповга ютқазиб қўйган. 2015 йилда эса ўз вазн тоифасида иккинчи рақам остида сараланган Ҳасанбой дастлабки жангидаёқ, кутилмаганда озарбайжонлик Руфат Ҳусейновга уч раундлик жанг якунларига кўра 1:2 ҳисобида имкониятни бой берганди. Айнан ушбу мағлубиятлар боксчимизга навбатдаги жаҳон чемпионатида стимул бериши мумкин. Олимпиада чемпионлигини қўлга киритган, кетма-кет икки карра Осиё чемпиони деб топилган боксчимиз жаҳон чемпионлигини қўлга киритиш вақти келган деб ўйлаймиз!

Азиз Тўхтамуродов