"Ватан сени фақат ғалаба билан кутади". Бош вазир Абдулла Арипов Олимпиячиларимизга омад тилади

Бугун Тошкент Халқаро аэропортида делегациямизнинг асосий таркиби кун чиқар юртга чартер рейс билан жўнаб кетди. Делегация тантанали тарзда кузатилди. Тадбирда Ўзбекистон Республикаси Бош вазири Абдулла Арипов, Олий Мажлис Сенати раиси Танзила Нарбаева ҳам иштирок этишди ҳамда спортчиларимизга омад тилашди. Ҳукуматимиз раҳбарлари делегация байроғини тантанали равишда МОҚ раиси Рустам Шоабдураҳмоновга топширди. 

Шундан сўнг сўз олган ҳукумат раҳбари:

"4 йил эмас, 5 йил давомида сиз спорт оиласи интиқиб, меҳнат қилиб кутган кун келди мана. Энг муҳими, машаққат билан қўлга киритиган 71 та лицензия эгалари Токиода юртимиз шарафини муносиб ҳимоя қилиши керак. Сизнинг тайёргарлик кўришингиз учун ҳар томонлама шароит яратиб берилди. Назаримда, бирор федерация вакили ёки спортчи яна қандайдир қўшимча чора-тадбирлар кўрилса бўлардию, лекин унга маблағ етмади деб айта олмайди. Негаки, Президентимизнинг топшириқлари асосида федерация раҳбарлари билан биргаликда бир неча марта йиғилиш ўтказилган ва сўралган маблағлар билан таъминланган. Тайёргарлик ҳам шунга яраша бўлди деб ҳурматли Президентимизни ишонтирсам бўладими?", - дея мурожаат қилди спортчиларимизга мамлакатимиз Бош вазири Абдулла Арипов.

"Ҳурматли спортчилар, унутмангки, сизни 35 миллион халқ дуо қилади, сизга мухлислик қилади, сизни интиқ бўлиб кутади. Улуғ  Ватаннинг улуғ фарзанди, билиб қўйки, сени Ватан кутади. Ватан сени фақат ғалаба билан кутади",- деди Арипов Президентимизнинг олимпиадачиларига билдирган ишончларини эслатар экан.