"WТ Diamond Games". Иккала таркибдаги таэквондочиларимиз ҳисобида ҳам медаллар!

Маълум қилганимиздек, бугунги беллашувлар доирасида 295 кг вазн тоифасида аралаш жуфтлик баҳсларида иккита таркибдан иборат жамоамиз иштирок этди. Қувонарлиси, якунда ҳар икки тўртлигимиз совриндорлар қаторидан жой олди.

Озодбек Мамадалиев, Ёдгор Жўрабоев, Севинч Ҳайитова, Озода Собиржоновадан иборат Ўзбекистон 1 таркиби дастлаб Сингапурни, чорак финалда эса мусобақада биринчи рақам остида сараланган мезбонлар — Корея Республикасини мағлуб этди. Шиддатли кечган ярим финал баҳсида эса омад Қозоғистонга кулиб боқди. Шундай бўлса-да, бронза медаллари учун ўтказилган жангда ҳамюртларимиз Марокаш вакилларига ҳеч қандай имкон қолдирмади.

Ўзбекистон 2 (Диёрбек Тўхлибоев, Шуҳрат Салаев, Шаббона Абдувалиева, Светлана Осипова) квартети эса илк босқичда Индонезия, сўнгра Мўғулистон терма жамоаси аъзоларига чиқиш эшикларини кўрсатди. Финал беллашувида эса аввалроқ биринчи тўртлигимизни енгган Қозоғистон термаси ортиқча қийинчиликсиз доғда қолдирилди.

Шундай қилиб, "WT Diamond Games" турнирининг иккинчи кунги дастури доирасида 295 кг вазн тоифасида аралаш жуфтлик баҳсларида қатнашиб, 1 та олтин ва 1 та бронза медалларига эга чиқдик. Ҳозирча ҳисобимизда 2 та олтин, 1 та бронза медали бор.

Эртага турнирнинг сўнгги кунида индивидуал жанглар ташкил этилади.