Хабиб чемпион Усман Нурмагомедовнинг жангини ҳам эълон қилди

Бу хабарни Усманнинг қариндоши Хабиб Нурмагомедов тасдиқлади. Усман 4 октябрь куни БААнинг Дубай шаҳрида ўтказиладиган PFL турнири доирасида ирландиялик Пол Хьюзга қарши октагонга чиқади. Бу Пол учун реванш мақомидаги жанг бўлади. 

"Усман 4 октябрь куни Дубайда жанг ўтказади. Унинг рақиби сўнгги жангидаги Хьюз бўлади. Январь ойидаги жанги оғир бўлганди. Кўрамиз, реванш қандай кечар экан?", – деди Хабиб Нурмагомедов Нью-Йоркдаги матбуот анжуманида.

Эслатиб ўтамиз, Усман Нурмагомедов ва Пол Хьюз ўртасидаги жанг шу йилнинг 25 январь куни Дубайдаги PFL Champions Series турнири доирасида ўтказилганди. Беш раунд тўлиқ давом этган баҳсда россиялик аралаш яккакураш устаси ҳакамларнинг қарорига кўра очколар ҳисобида ғалаба қозонганди. Май ойида Хьюз Белфастдаги турнирда бразилиялик Бруно Мирандани 42 сониядаёқ нокаутга учратиб, муваффақиятли қайтган эди.