Хоккей бўйича Қозоғистон чемпионати-2025 якунланди, "Арлан" мусобақа ғолиби, бронза медалларини қўлга киритиши мумкин бўлган "Ҳумо"ни эса "чопишди"

Финал беллашувида "Арлан" кетма-кет тўртта учрашувда "Торпедо" устидан ғалаба қозониб, мусобақа чемпионига айланди. "Торпедо" ярим финал босқичида Тошкентнинг "Ҳумо" клубидан устун келганди. "Арлан" эса финал йўлида "Сариарка"ни мағлубиятга учратган эди.

Эътиборлиси, ярим финалда мағлуб бўлган "Сариарка" ва "Ҳумо" чемпионатнинг бронза медаллари учун ўзаро ўйин ўтказиши керак эди. Лекин Қозоғистон чемпионати регламентига кўра, хорижий клуб совриндор ўринларни эгаллай олмас эди, "Ҳумо"да фақатгина чемпионатда ғолиб бўлиш ёки кубокда зафар қучиши имкониятигина бор эди.

Шу муносабат билан, чемпионатда учинчи ўрин учун беллашув ташкил этилмади ва ўз-ўзидан Қарағанданинг "Сариарка" клубига бронза медаллари тақдим этилди.