Ёш эркин курашчиларимиз Грециядаги турнирда 5 та медаль қўлга киритишди

Мусобақада Республика олимпия захиралари коллежининг спорт курашлари бўлимида таҳсил олаётган ёш эркин курашчиларимиз - Амирхон ва Ҳожихон Каримов, Абдуллоҳ Машрабов, Яккакураш спорт турларига ихтисослаштирилган болалар-ўсмирлар спорт мактаби тарбияланувчилари Шоҳруҳ Раимов ва Озодбек Озодбеков ҳам муваффақиятли иштирок этишди. 

Эътиборлиси, бу турнирда ҳам Санжар Машрабов шогирдларининг бари худди бир ҳафта аввал Польшада бўлгани каби шоҳсупага кўтарилишди. Польшада эгизак Каримовлар битта вазнда қатнашиб, финалга етиб келишганди. Одатга кўра ака-укалар финалда бир-бирларига қарши гиламга чиқишмаган, шунчаки олтин ва кумуш медалларни бўлишиб олишган эди. Шоҳруҳ Раимов ва Озодбек Озодбеков кумуш, Абдуллоҳ Машрабов эса бронза медалига сазовор бўлганди. 

Кеча ёш курашчиларимиз Олимпиаданинг тарихий ватани, аниқроғи Крит оролида якунига етган халқаро турнирда ҳам 5 та медалга эга чиқишди. Бу сафар ҳам эгизак Каримовлар финалга етиб келишди ва бу гал ҳам финал беллашуви ўтказилмади. Ҳожихон Каримов олтин, Амирхон эса кумуш медални ўзиники қилиб олди. Шоҳруҳ Раимов ва Озодбек Озодбеков олтин, Абдуллоҳ Машрабов кумуш медални қўлга киритди.