O'zbekiston MOQ vakillari Pekin shahriga etib borishdi

Unda butun dunyodan tashrif buyuradigan 91 mamlakat vakillari orasida O'zbekiston delegaciya ham ishtirok etadi. Bugun O'zbekiston delegaciyasidan o'rin Milliy Olimpiya qo'mitasi vakillari - Xalqaro aloqalar departamenti bosh mutaxassisi, Tashkiliy qo'mita bilan aloqalarga masul Nozim Atakulov hamda Qo'mitaning OAV va jamoatchilik bilan aloqalar departamenti bosh mutaxassisi, matbuot xizmatiga masul Nurali Yo'ldoshevlar Pekin shahriga etib borishdi. Ishchi guruhi dastlabki tekshiruvlardan muvaffaqiyatli o'tishdi. Asosiysi vakillarimiz sog'-salomat.

Bu yilgi qishki Olimpiadada tog' chang'isi sportida Komiljon To'xtaev yurtimiz sharafini himoya qilishidan xabaringiz bor. Sportchimiz 13 fevral kuni gigant slalom, 16 fevralda esa slalom dasturida o'z chiqishini namoyish etadi. Tabiiyki, ochilish marosimida ham u bayroqdorimiz bo'lib, “Qush uyasi” stadioniga delegaciyamizni boshlab chiqadi.

Hozirgi kunda Komiljon To'xtaev Italiyada bo'lajak Olimpiya o'yinlariga tayyorgarlik ko'rmoqda. Rejaga ko'ra sportchimiz ham bugun Milan shahridan to'g'ri Pekinga yo'l olishi ko'zda tutilgan. Uning italiyalik murabbiyi Mattia Jianessi esa 9 fevral kuni Xitoyga etib boradi. Sportchimizning Olimpiya o'yinlariga olib borayotgan tayyorgarligi va delegaciyamizning musobaqadagi ishtiroki davlatimiz tomonidan qo'llab-quvvatlanmoqda.

Rejaga ko'ra, bugun ishchi guruhi Pekindagi Olimpiya shaharchasida qolib, sportchimiz va uning murabbiyning tashrifi uchun tayyorgarlik ko'radi. Ertaga esa hamyurtimiz Komiljon To'xtaev musobaqada ishtirok etadigan Yancin shahriga borib joylashadi.