23 окт 12:16
Янгиликлар

Теннис

37 ёшли Монфис Nordic Open турнири ғолиби!

Швециянинг Стокгольм шаҳрида теннис бўйича нуфузли ATP турнири 37 ёшли Гаэль Монфиснинг ғалабаси билан якунланди.

Дунёнинг 140-ракеткаси бўлиб келган франциялик теннисчи финал баҳсида ATP рейтингида 109-поғонада бораётган россиялик Павел Котов устидан иродали ғалабага эришди - 4/6, 7/6(6), 6/3. Бу теннисчиларнинг ўзаро илк учрашуви эди. Икки соату 36 дақиқа давом этган драматик баҳсда Монфис 7, Котов 2 та эйс зарбасини амалга оширган.

Франциялик теннисчи фаолиятидаги 12-совринини қўлга киритди. BNP Paribas Nordic Open турниридаги муваффақиятли иштирок Гаэлга 250 рейтинг очкоси ҳамда 102,460 евро мукофот пули келтирди. Котов эса бир ҳафталик меҳнатидан 150 очко ва 59,760 евро ишлаб олди. Бугун янгиланган ҳафталик рейтингда Монфис 89, Котов эса 81-поғонага кўтарилди.