Чирчиқда турли шиорлар остидаги спорт тадбирлари ташкил этилди

Хусусан, жорий йилнинг 10 декабрь куни Чирчиқ шаҳрида “Street workout” (“кўча спорти”) ҳамда парақиличбозлик бўйича мусобақалар ташкил этилди. Куннинг биринчи ярмида Чирчиқ шаҳрининг “Шодлик” МФЙ ҳудудидаги гимнастика майдончасида иккинчи сектор раҳбари, шаҳар прокурори Хайрулла Бўриев ташаббуси билан ёшлар ўртасида “Спортни сев, спорт билан яша” шиори остида “Street workout”  бўйича “Прокурор кубоги”бўлиб ўтди. Қизиқарли тарзда ўтган беллашувларда ҳаваскор спортчи-ёшлар ўз маҳоратларини намойиш этишди. Якуний натижаларга кўра,  ”Адолат” ҳамда “Мирзо Ғолиб” МФЙ ёшлари пешқадам  бўлишди. Ғолиб ва совриндорлар кубок, диплом ва эсдалик совғалари билан мукофотланишди. Мусобақанинг тақдирлаш маросимда Чирчиқ шаҳар прокурори Х. Бўриев ғолиб спортчиларни тақдирлар экан, мамлакатимизда ёшларимиз учун жисмоний тарбия ва спортга берилаётган эътибор, яратилаётган шарт –шароитлар ҳақида тўхталиб, мазкур имкониятлардан самарали фойдаланишга чақирди. Шунингдек, тақдирлаш маросимида Халқ депутатлари Чирчиқ шаҳар Кенгаши раиси ўринбосари Равшан Дастиров ва ушбу “Шодлик” маҳалласидан сайланган Халқ депутатлари Чирчиқ шаҳар кенгаши депутати Ўткир Тожибоевлар иштирок этишди.

Куннинг иккинчи ярмида эса  қиличбозлик залида Қизил ярим ой жамияти Чирчиқ шаҳар бўлими кубоги учун “Спорт ҳамма учун” шиори остида  имконияти чекланган ногирон спортчилар ўртасида парақиличбозлик бўйича мусобақа бўлиб ўтди. “Адолат” СДП Чирчиқ шаҳар Кенгаши, Тошкент вилояти қиличбозлик федерацияси, Чирчиқ шаҳар Туризм ва спорт бўлими, “Адолат” СДПнинг “Ёш адолатчилар” қаноти Тошкент вилояти Кенгаши, Чирчиқ олимпия захиралари коллежи,  Қизил ярим ой жамияти Чирчиқ шаҳар бўлими билан ҳамкорликда ўтказилган ушбу мусобақада спортчилар қиличбозликнинг  шпага йўналишида беллашишди. Кўтарингки руҳда ўтган беллашувларнинг якуний натижалирга кўра эркаклар ўртасида Достон Давронов биринчи, Муслим Муталимов иккинчи, Элдорбек Эргашбоев ва Обид Норбўтаевлар учинчи ўриннларни эгаллашди. Аёллар ўртасида эса фахрли биринчи ўрин Албина Нуриддиновага насиб этди. Иккинчи ўринни Сетора Қодирова эгаллаган бўлса, учинчи ўринни Турсуной Абдуллаева ҳамда Наимахон Иминжоновалар қўлга киритишди.

Кучли учликдан жой олган спортчилар ҳамкор ташкилотлар томонидан диплом, медаль ва эсдалик совғалари билан мукофотланишди. 

Мусобақада сектор раҳбарлари, “Адолат” СДПнинг Чирчиқ шаҳар кенгаши раиси Р. Дастиров,  Қизил ярим ой жамияти Чирчиқ шаҳар бўлими раҳбари Юнус Рустамов, Халқ депутатлари шаҳар кенгаши депутатлари, “Маҳалла” хайрия жамоат фонди Чирчиқ шаҳар бўлинмаси раиси Ў. Тожибоев ва бошқалар иштирок этишди.

Илҳом РАҲМОНОВ тайёрлади