Esports World Cup Chess. Нодирбек Абдусатторовнинг 1/4 финалдаги рақиби маълум

NAVI жамоаси шарафини ҳимоя қилаётган Нодирбек Абдусатторовнинг D гуруҳидан иккинчи ўрин соҳиби сифатида плей-оффга йўлланма олгани ҳақида хабар берган эдик. Ёш гроссмейстеримиз қуръа натижасига кўра 1/4 финалда франциялик Алиреза Фирузджага қарши дона сурадиган бўлди.  

Ушбу жуфтлик ғолиби 1/2 финалда Ян Непомняший (Россия) - Аржун Эргаиси (Ҳиндистон) учрашуви ғолибига қарши баҳс олиб боради. Бугунги 1/4 финал учрашувлари бизнинг вақт билан соат 17:00да бошланади. 

Кеча Абдусатторов 1/4 финалда ким билан тўқнаш келишни хоҳлар эдинг, деган саволга "Магнус Карлсен билан тушсам яхши бўларди" дея жавоб берганди.

Ушбу босқич баҳслари ҳам 2 та асосий партиядан иборат бўлади. Шахматчилар оқ ва қора доналарда ўзаро икки бор ҳисоб-китоб қилишади. Ҳар бир шахматчига 10 дақиқадан вақт берилади. Қўшимча вақт тақдим этилмайди. Дуранг бўлган ҳолатда ғолибни аниқлаб берувчи армагеддон партиясига мурожаат қилинади. 

Esports World Cup Chess. 1/4 финал жуфтликлари

Нодирбек Абдусатторов — Алиреза Фирузджа (Франция)

Ян Непомняший (Россия) — Аржун Эргаиси (Ҳиндистон)

Магнус Карлсен (Норвегия) — Ниҳал Сарин (Ҳиндистон)

Ҳикару Накамура (АҚШ) — Левон Аронян (АҚШ)