Esports World Cup Chess турнирида финалчилар аниқланди

NAVI жамоаси шарафини ҳимоя қилаётган Нодирбек Абдусатторовнинг D гуруҳидан иккинчи ўрин соҳиби сифатида плей-оффга йўлланма олгани ҳақида хабар берган эдик. Ёш гроссмейстеримиз қуръа натижасига кўра 1/4 финалда франциялик Алиреза Фирузджага қарши дона сурди. 

Драматик кечган 4 та партиядан иборат учрашувлар якунида омад Алирезага кулиб боқди. Дастлабки икки партияда дуранг қайд этилганди. Муҳим палладаги хатолар Нодирбекка қимматга тушди.  

Esports World Cup Chess. 1/4 финал жуфтликлари

Нодирбек Абдусатторов — Алиреза Фирузджа (Франция) — 1:3

Ян Непомняший (Россия) — Аржун Эргаиси (Ҳиндистон) — 1,5:2,5

Магнус Карлсен (Норвегия) — Ниҳал Сарин (Ҳиндистон) — 2,5:0,5

Ҳикару Накамура (АҚШ) — Левон Аронян (АҚШ) — 2,5:1,5

Чорак финалнинг қолган жуфтликларида ҳиндистонлик Аржун Эргаиси россиялик Ян Непомняшийни, америкалик Ҳикару Накамура ҳамюрти Левон Аронянни, жаҳон тождори Магнус Карлсен ҳиндистонлик Ниҳал Саринни мағлуб этиб, 1/2 финалга йўл олди. 

Ярим финалда Алиреза Фирузджа Аржун Эргаисидан 4:1 ҳисобида устун келди. Иккинчи ярим финал драматик кечди. Магнус Карлсен ғолиб номини аниқлаб берган армагеддон партиясида Ҳикару Накамурани таслим этиб, финал чиптасини қўлга киритди.         

Бугун Esports World Cup Chess чемпионлиги учун Магнус Карлсен Алиреза Фирузджага қарши баҳс олиб борса, Ҳикару Накамура ва Аржун Эргаиси ўртасидаги учрашувда мусобақанинг бронза медали соҳиби аниқланади. Чемпион 250 000 АҚШ долларига эга чиқади.