Фрэнсис Нганну Жон Жонсни жангга чақирди, америкалик эса унга жавоб қайтарди

Кечанинг учинчи асосий жангида UFC оғир вазн тоифасининг собиқ чемпиони Фрэнсис Нганну собиқ UFC жангчиси, бразилиялик Филипе Линсга қарши октагонга чиқди.

Нганну биринчи раунд охирида рақибини нокаутга учратди ва шундан кейин UFC’нинг собиқ юлдузи Жон Жонсни жангга чақирди.

"У менинг нима қилаётганимни кузатиб, ўрганиши керак. Кейин эса бу жангга чиқсин", — деди Нганну жангдан кейинги интервьюда.

Жонснинг жавоби узоқ куттирмади, чунки америкалик аренадан туриб эфирда қатнашган эди.

"Аввало UFC билан шартномамдан чиқишга эътибор қаратишим керак. Агар бу жанг амалга ошса, энг қийин қисми шу бўлади. Менимча, Дана Фрэнсис билан ишлашдан манфаатдор эмас. Шунинг учун буни MVP орқали амалга ошириш ягона йўл бўлиши мумкин. Агар шартномадан чиқишнинг уддасидан чиқсак, бу ажойиб бўларди", — деди Жонс.

Эслатиб ўтамиз, кўпчилик Жонс ва Нганну жангини ҳали UFC давридаёқ кўришни истаган, аммо турли сабабларга кўра бу тўқнашув амалга ошмаган.