"Ҳумо" бош мураббийи Катаев: "Бу ўйинга изоҳ шарт эмас"

"Барчамиз ўйинни кўрдик. Афсуски, биз кейинги босқичга чиқа олмадик. Бундан жуда ҳам хафамиз. Лекин бугунги ўйинга изоҳ шарт эмас. Қайси босқичда ва қаерда ўйнаётганимизни билардик, аввалроқ ҳам ютишимиз мумкин эди, кеча ҳам. Бироқ афсус бўлсинки, натижаларимиз шундай бўлиб турибди. Серияга келадиган бўлсак, жуда жанговар ўйинлар кўрдик. Ҳеч бир йигитимга шикоятим йўқ. Жамоавий меҳнат яхши бўлди. Олтинчи ўйинни ўзидаёқ ҳал қилишимиз керак эди. Бу сафар ҳам анча яхши ўйнадик. Мухлисларимизга катта раҳмат айтамиз. Улар бизни чиройли изоҳлар, видео-роликлар билан қўллаб-қувватлаяпти", деди Катаев.

Тошкент ва Усть-Каменогорск шаҳарлари шарафини ҳимоя қилувчи жамоалар ўртасида кечган еттита ўйиндан иборат серияда Торпедо (Усть-Каменогорск) вакиллари умумий 4:3 ҳисобида ғолиб бўлиб, финалга йўл олди.