Келвин Гастелум Шавкат Раҳмоновнинг "вызов"ига жавоб берди

Бу хабардан кейин қозоғистонлик Шавкат Раҳмонов уни янги дивизиондаги илк жангидаёқ қарши олишини айтганди. Гастелум Раҳмоновнинг ушбу чорловига жавоб қайтарди.  

"Менга бу "вызов" ёқади ва уни ҳурмат қиламан. Лекин у бироз зерикарли кўринади. Озгина тезкорлик қўшса яхши бўларди. Айнан шундай жангларни қадрлайман. Бу жанг менга океандаги акулалар қаторида эркин сузишимга ёрдам беради. Суз ёки океан тубига ғарқ бўл. 

Адашмасам, Шавкат рейтингнинг бешинчи ёки олтинчи поғонасидан жой олган. Бўлажак жангдаги ғалаба мени камар учун яқинлаштиради. Унинг "вызов"ига бир ҳафта бўлди. Ўша пайтда мен таътилда ва ўз ишларим билан банд эдим. Энди бу чақирувни расман қабул қилиш фурсати етди. Шавкат Раҳмонов, мен сенинг яримўрта вазндаги чорловингни қабул қилдим. Жанг санасини мен белгилайман. Дана Уайт матбуот анжуманида 16 сентябрь куни Лас-Вегасда ўтказиладиган катта турнир ҳақида гапирганди. Бу сана Мексика мустақиллиги кунига тўғри келади. Асл келиб чиқишим мексикалик бўлганим учун ҳам шу кунги турнирда жанг қилишдан умидворман. Кел, буни амалга оширамиз. Мен сенинг "вызов"ингни қабул қилдим, Шавкат!", - деди Гастелум.

Эслатиб ўтамиз, 31 ёшли Келвин Гастелум яримўрта вазн тоифасидаги сўнгги жангини 2016 йилнинг июль ойида Жони Хендриксга қарши ўтказиб, очколар ҳисобига кўра ғалаба қозонганди. Шу йилнинг апрель ойида у кетма-кет иккита мағлубиятдан сўнг октагонга қайтиб, Крис Кёртисдан устун келганди. Айни пайтда у ўрта вазн тоифаси UFC рейтингида 11-ўринни эгаллаб турибди.

28 ёшли Шавкат Раҳмонов шу йилнинг март ойида Жефф Нилни учинчи раундда бўғиш усули билан таслим этганди. Бу унинг UFC октагонида муддатидан аввал кетма-кет қўлга киритган бешинчи ғалабаси эди.