Полина Кудерметова дунёнинг 24-ракеткасига қарши кортга чиқди

Мамлакатимизнинг учинчи ракеткаси Полина Кудерметова мусобақанинг асосий тўр баҳсларига саралаш турниридаги икки ғалабаси эвазига йўл олган эди. Вакиламиз асосий тўрнинг илк даврасида украиналик Олександра Олийниковани уч сет натижасига кўра қийинчилик билан мағлубиятга учратганди - 3/6, 7/6(1), 6/4.    

Афсуски, Полина 76 дақиқа давом этган 1/16 финал учрашувида дунёнинг 24-ракеткаси, канадалик иқтидор эгаси Лейла Фернандесга 2/6, 1/6 ҳисобида имкониятни бой бериб, мусобақадаги иштирокини якунлади. Турнирда тўққизинчи рақам остида таснифланган Лейла ўз иштирокини тўғридан-тўғри иккинчи даврадан бошлади.

Маълумот учун, Кудерметова ҳозирда WTA рейтингида 156, Олийникова 71, Фернандес 24-ўринни эгаллаб турибди. Полина 1 та эйс зарбасини амалга оширди, Лейлада эса бу статистик кўрсаткич нолни ташкил қилди. Қўшхатолар Кудерметовада уч баробарга кўп бўлди - 6 га 2. Бу теннисчиларнинг ўзаро ўтказган илк учрашуви бўлди.