Полина Кудерметова дунёнинг 71-ракеткасини мағлуб этди

Мамлакатимизнинг учинчи ракеткаси Полина Кудерметова мусобақанинг асосий тўр баҳсларига саралаш турниридаги икки ғалабаси эвазига йўл олган эди. Вакиламиз кеча тунда асосий тўрнинг илк даврасида украиналик Олександра Олийниковага қарши кортга чиқди. Икки соату 24 дақиқа давом этган муросасиз баҳсда 22 ёшли Кудерметова рақибасини уч сет натижасига кўра қийинчилик билан мағлубиятга учратди - 3/6, 7/6(1), 6/4.    

Маълумот учун, Кудерметова ҳозирда WTA рейтингида 156, Олийникова 71-ўринни эгаллаб турибди. Полина 4, Олександра 3 та эйс зарбасини амалга оширган. Қўшхатолар украиналик теннисчида кўпроқ бўлди - 6 га 4. Бу теннисчиларнинг ўзаро ўтказган иккинчи учрашуви бўлди. Шу йилнинг 25 февраль куни Туркия турниридаги илк баҳсда Олийникова уч сет натижасига кўра ғалаба қозонганди. 

Бугун Полина Кудерметова 1/16 финалда дунёнинг 24-ракеткаси, канадалик иқтидор эгаси Лейла Фернандесга қарши кортга чиқади. Ушбу баҳс бизнинг вақт билан соат 23:30да бошланади. Турнирда тўққизинчи рақам остида таснифланган Лейла ўз иштирокини тўғридан-тўғри иккинчи даврадан бошлайди.