25 июн 16:05
Янгиликлар

Бошқалар

Пойтахтлик ёш крикетчиларда ғалаба шукуҳи + ФОТО

22-24 июнь кунлари пойтахтимизнинг Юнусобод туманидаги “Ўзбекистон” спорт мажмуаси ҳудудидаги стадионда ўсмирлардан таркиб топган Тошкентнинг “Eagles” ҳамда Бухоронинг “Defenders” жамоалари ўртасида крикет бўйича беллашув ташкил этилди.

Уч кун давомида икки бўлимдан иборат бўлган шиддатли ўйинларнинг якуний натижаларига кўра Тошкент шаҳрининг “Eagles” жамоаси рақибларини 127:125 натижасига кўра ортда қолдириб, ғолибликни тантана қилишди.

Асли ватани Англия бўлган ва миллионлаб ашаддий мухлисларига эга ҳисобланган крикет спорт тури ёшларимизнинг севимли спорт турига айланиб бораётганини биргина ушбу иккита жамоа ўртасидаги ўйин жараёнларидан ҳам сезиш мумкин эди.

Боиси, жамоалардаги ҳар бир иштирокчиларнинг зўр қизиқиш ва иштиёқ билан ўйинга берилиб кетиши, очко олишга эришса қувончдан бир-бирини қутлаши, аксинча эса янаям шиддат билан ўйинга киришиши ёшларни крикетга ошно бўлганидан далолат эди.

Ўйин якунига етгач, тақдирлаш маросимида Ўзбекистон крикет федерацияси раиси Азиз Михлиев иштирок этиб, ғолиб жамоага диплом ва кубок топширган бўлса, “ANFA PHARMACEUTICALS” компанияси томонидан ҳам ушбу жамоага ҳомийлик сифатида 2 миллион сўм пул мукофоти тақдим этилди.

Шунингдек, турли номинациялар бўйича ҳам ғолиблар аниқланди. “Энг яхши ўйинчи” номинациясини Жамшид Мамарасулов қўлга киритган бўлса, “Энг яхши боулер (тўп отувчи)” номинациясига Жасур Эшмаматов, “Энг яхши бэтсмен (ҳимоячи)” номинацияга Ғолиб Тўйчиев эга бўлди.