18 май 16:28
Янгиликлар

Бокс/ММА

Шаҳрам Ғиёсов АҚШда жанг ўтказади, у Фируза Шарипова билан бир залда машғулот ўтказди + ФОТО

Шу кунларда профессионал боксда муроса ва мағлубият нималигини билмай келаётган ҳамюртимиз Шаҳрам Ғиёсов Россиянинг Санкт-Петербург шаҳрида машғулотларни ўтказяпти.

Чарм қўлқоп устамизнинг бизга хабар беришича, унинг навбатдаги жанги ҳам АҚШда бўлиб ўтади.

"Жангимнинг АҚШда ўтказилиши ойдинлашди. Тез орада жанг санаси ва рақибим ҳақида расмий маълумот берамиз", - деди Ғиёсов.

Боксчимиз Инстаграм саҳифасига жойлаган суратда қозоғистонлик таниқли боксчи Фируза Шарипова ҳам акс этган. Улар битта залда машғулот ўтказишяпти.

Маълумот учун, Шаҳрам Ғиёсов сўнгги жангини ўтган йилнинг 8 май тонгида АҚШнинг Лас-Вегас шаҳрида мексикалик Кристиан Гомесга қарши ўтказиб, очколар ҳисобига кўра ғалаба қозонган эди. Бу Шаҳрам учун профессионал фаолиятидаги 13-жангдаги 13-ғалабаси бўлганди. У ўтказган жангларининг 9 тасида муддатидан олдин ғалаба қозонган.

Ғиёсов айнан бир йил олдинги жангида ярим ўрта вазн (66,6 кг) тоифасида IBF North American Шимолий Америка минтақавий чемпионлик камарини қўлга киритганди. Айни пайтда у IBF рейтингининг 6-поғонасини банд этган.