Ширин шаҳрида бел олиш ва уч кураш бўйича Ўзбекистон чемпионати бошланди

Ўзбекистон Республикаси Жисмоний тарбия ва спорт вазирлиги ҳамда Ўзбекистон Бел олиш ва уч кураш ассоциациясининг йиллик – тақвим режасидаги мазкур мамлакат чемпионатида  Қорақалпоғистон Республикаси, Тошкент шаҳри ва барча  вилоятлардан  500 нафардан ортиқ ёш полвонлар ғолиблик учун кураш тушишмоқда.

БЎСМ  спорт залида дастлаб,  мусобақанинг тантанали очилиш маросими  ташкил этилди. Маросимда сўз олган  Ширин шаҳар ҳокимининг ёшлар сиёсати, ижтимоий ривожлантириш ва маънавий – маърифий ишлар бўйича ўринбосари Насиба Алимова, Ўзбекистон бел олиш ва уч кураш ассоциацияси бош котиби Носир Азизовлар спортчиларни қутлар экан,  мамлакатимизда жисмоний тарбия ва спортнинг оммавийлигига кенг эътибор қаратилаётгани, хусусан, миллий спорт турларига бўлган қизиқиш ва эътиборнинг ортгани ҳақида таъкидлаб,  мусобақа қатнашчиларига  муваффақият тилашди. Шундан сўнг беллашувларга старт берилди.  

Мусобақа регламентига мувофиқ, бугун 2005 - 2008  йилларда туғилган ўсмирлар бел олиш кураш тури бўйича бел олиш, бел олишнинг халқа  - чалиш, бел олишнинг халқа - чалишсиз йўналишларида ўғил болалар 10 та вазнда, қизлар эса 3 та вазн тоифасига  кўра беллашишади. Мусобақалар 25 декабрга қадар давом этади.