Superbet Chess Classic Romania. Нодирбек Абдусатторов пешқадамдан очко тортиб олди

Grand Chess Tour 2025 таснифига кирувчи — Superbet Chess Classic Romania турнирининг мукофот жамғармаси 350 000 АҚШ долларини ташкил қилади. Ғолиб умумий сумманинг 100 000 долларига эга бўлади. Дунёнинг кўзга кўринган гроссмейстерлари қаторида бош соврин учун Нодирбек Абдусатторов ҳам кураш олиб бормоқда. 

Гроссмейстеримиз кеча ўтказилган 6-тур учрашувида қора доналарда пешқадамлардан бири франциялик Максим Вашье-Лагравга қарши баҳс олиб борди ва дурангга имзо чекди. Ҳозирча Нодирбек ҳисобида ғалаба йўқ. У 5 та партияда дуранг ўйнаб, биттасида мағлубият аламини тотиб кўрган. 

Амалдаги жаҳон чемпиони, ҳиндистонлик Гукеш Доммараджу учун Руминиядаги турнир омадсиз ўтмоқда. Бу сафар Гукеш 6-турда француз Алиреза Фирузджага ютқазиб қўйди. Олтинчи турнинг қолган партияларида шахматчилар муроса йўлини танлашди. 

Турнир жадвалида 4 шахматчи - Фабиано Каруана, Алиреза Фирузджа, Максим Вашье-Лаграв ва Рамешбабу Праггнанандҳа 3,5 очкодан жамғариб, пешқадамлик қилишяпти. Нодирбек Абдусатторов 2,5 очко билан 8-поғонадан жой олган. Икки очкога эга Гукеш сўнгги 10-ўринни банд этган.

 Бугун Абдусатторов 7-турда ўзи сингари 2,5 очко жамғариб, 9-поғонада бораётган польшалик Ян-Криштоф Дудага қарши оқ доналарда ўйнайди.