Tata Steel Chess. Эҳ, Абдусатторов, Якуббоевда кетма-кет иккинчи ғалаба

Кеча ўтказилган 12-турда "Мастерс" гуруҳи пешқадамлари сафида бораётган Нодирбек Абдусатторов қора доналарда ўйнаб, асосий рақибларидан бири ҳиндистонлик Аржун Эргаисига қўпол хато эвазига имкониятни бой бериб қўйди. Бу турнирни омадсиз ўтказаётган Аржуннинг мусобақалаги илк ғалабаси, аксинча, Нодирбекнинг биринчи мағлубияти эди. 

Кечаги мағлубият сабаб Нодирбек Абдусатторовнинг чемпион бўлиш имкониятлари йўққа чиқди. Боиси, биринчи ва иккинчи ўринни эгаллаб турган ҳинд гроссмейстерлари ўз ҳисобларига қимматли очколарни ёзиб қўйишди. Рамешбабу Прагнанандҳа сербиялик Алексей Саранани мағлубиятга учратган бўлса, амалдаги жаҳон чемпиони Гукеш Доммараджу қора доналарда нидерландиялик Йорден Ван Форест билан муросага келди. Гукеш ва Прагнанандҳа 8,5 очкодан жамғаришган, Абдусатторов ҳисобида 7,5 очко бор. 

"Мастерс" гуруҳида мағлубиятга учрамаган икки шахматчи қолди - Гукеш Доммараджу ва Вей И. Хитойлик гроссмейстернинг 1 ғалаба, 11 та дуранг қайд этгани эътиборга молик ҳолат. У 6,5 очко билан 5-ўриндан жой олга. Владимир Федосеев кечаги ғалабаси эвазига 7 очко билан 4-ўринга кўтарилиб олди. 

"Челленжер" гуруҳида қатнашаётган Нодирбек Якуббоев (2659) кетма-кет иккинчи ғалабасини қўлга киритди. У 12-турда оқ доналарда нидерландиялик Артур Пуперсга чиройли усулда мот қўйди. Ушбу ғалабадан кейин Якуббоев 7 очко билан 6-ўринга кўтарилиб олди. Бешинчи поғонадаги германиялик Фредерик Сван ҳисобида ҳам 7 очко бор.

Чехиялик Ван Нгуен 8,5 очко билан "Челленжер" гуруҳида қўшимча кўрсаткичларга кўра карвонбошилик қиляпти. Озарбайжонлик Айдин Сулейманли ва нидерландиялик Эрвин Л`ами ҳисобида ҳам 8,5 очкодан бор, улар кучли учликни якунлаб беришган.