UFC таклифини рад этган Немков 17 июнь куни 46 ёшли Ромеро билан жанг қилади

Унда Вадим Немков ўзининг навбатдаги жангини 46 ёшли Йоел Ромерога қарши ўтказади. Кубалик қария спортчи сўнгги 2 та жангида ғалаба қозониб, кўпчиликни ҳайратда қолдирди, бироқ у ўзининг аввалгидек юқори формасида эмаслиги аниқ. 

Қизиғи шундаки, бу Bellator’да Вадим иккинчи маротаба ёши катта бўлган спортчига қарши жанг қилади. Немков аввалроқ 33 ёшли Кори Андерсон устидан ғалаба қозонган эди. Бироқ, Кори россиялик жангчидан реваншни умид қилиб юрибди. Дивизионнинг кучли бешлигида Фил Девис ҳам бор, у 38 ёшда. Девис бундан олдин икки марта Вадимга имкониятни бой берган, лекин у учунчи тўқнашувни ҳамон кутмоқда.

Россиялик спортчи Bellator’да ўзини “сувга тушган балиқдек” ҳис қилмоқда, сабаби у ерда кўплаб ёши катта жангчилар йиғилиб қолган. Немковнинг қўлида UFC’дан келган таклиф бор эди, аммо у сайёрадаги энг яхши лигада жанг қилишдан бош тортди. У Фёдор Емельяненконинг сўзларига қулоқ тутди ва ўз лавозимини ўзгартирмади. Бу ҳақида спортчининг ўзи интервьюсида маълум қилганди. Вадим UFC таклифини рад этиб, Bellator’да қолиб тўғри қилганми, ёки йўқ буни вақт кўрсатади. Лекин ҳозирча ҳаммаси рус жангчисининг фойдасига ишламоқда.