Қашқадарёнинг "яшил" тоифасига кирувчи ҳудудларида спорт қайта жонлантирилди

Юртимизга коронавирус пандемияси кириб келиши ва тарқалишининг олдини олиш бўйича Республика махсус комиссиясининг 2020 йил 29 майдаги қарорига асосан 2020 йил 1 июндан «яшил» ҳудудларда спорт секциялари, тўгараклари, спорт заллари ва фитнес клублар, 5 июндан эса бассейнлар, яъни сузиш ҳавзалари фаолиятига ҳам рухсат берилди.

Жумладан, Қашқадарё вилоятининг "яшил" тоифасига кирувчи ҳудудларидаги спорт секциялари, тўгараклари, спорт заллари ва фитнес клублари карантин қоидаларига қатъий риоя қилган ҳолда ўз фаолиятини йўлга қўймоқда.

Спорт иншоотлари, шу жумладан, очиқ майдонларнинг кириш-чиқиш жойларида фуқароларнинг тана ҳароратини пирометрларда ўлчаш, 37°С ва ундан юқори тана ҳарорати бўлган фуқароларни спорт иншоотларига киритмаслик ва бу ҳақида соғлиқни сақлаш бўлимларига хабар бериш, спорт тадбирлари ҳамда бадантарбия машғулотлари соат 07:30 дан 18:30 гача бўлган вақт оралиғида ташкил этилишига қатъий амал қилинмоқда.

Шу билан бирга, спорт иншоотларида машғулотлар бошланиши олдидан ва кун давомида бир неча маротаба дизенфикция ишлари амалга ошириляпти. Спортчилар ҳам ниқобларда бўлиши ва машғулотларда ижтимоий масофага амал қилиниши қатъий назорат қилинмоқда. Бундан кўзланган асосий мақсад, спортчилар ва тренерлар саломатлигини асрашдан иборат.