Расман: Деревянченко - Адамес жанги ғолиби WBC элиминаторида Мунгия билан тўқнаш келади

Шу кунларда Мехико шаҳрида (Мексика) Бутунжаҳон бокс кенгашининг (WBC) йиллик Конгресси бўлиб ўтмоқда. Унда анъанага кўра амалдаги чемпионларни мажбурий ҳимоя жанги ўтказиши бўйича қарорлар қабул қилинмоқда, шунингдек, элиминатор жанглари белгиланмоқда.

5 декабрь куни украиналик Сергей Деревянченко (13-3, 10 КО) ва доминикалик Карлос Адамес (20-1, 16 КО) ўртасида жанг бўлиб ўтади. Учрашув ғолиби  америкалик Жермелл Чарлога тегишли камар учун расмий даъвогарлик мақомини берувчи элиминатор жангида мексикалик Хайме Мунгия (38-0, 30 КО)га қарши рингга кўтарилиши расман тасдиқланди.

«Биз Деревянченко Адамес билан жанг қилмагунча ўрта дивизионни очиқ тутамиз», - деди WBC президенти Маурисио Сулайман.

Эслатиб ўтамиз, аввалроқ ташкилот Деревянченко - Мунгия элиминатор жангини тайинлаган эди, бироқ Хайме биринчи навбатда Габриэль Росадога қарши жанг қилишни афзал кўрди. 13 ноябрь куни у очколар бўйича ғалаба қозонди.